نىڭزەھەرلىكبۇيۇمئېلىپ-سېتىشدىلوسىنىڭئەيىبنامىسىxجاۋابكارز

شىنجاڭ ئۇيغۇر ئاپتونۇم رايۇنى

ئۈرۈمچى شەھەر شىمگو رايۇنلۇق خەلق تەپتىش مەھكىمىسىنىڭ

ئەيىبنامىسى

ئۈ ش ت 1-بۆلۈم ئە [2020] 9–نومۇرلۇق

ئۈرۈمچى شەھەر شىمگو رايونلۇق خەلق سوت مەھكىمىسىگە:

جاۋابكار زx، ئەر، ****-يىلى **-ئاينىڭ **-كۈنى ئۈرۈمچىدە تۇغۇلغان، كىملىك نۇمۇرى: 650102********6199 ، ئۇيغۇر، ئالىي تېخنىكوم مەلۇماتلىق، ئاپتونۇم رايونلۇق باش ئىشچىلار ئۇيۇشمىسىنىڭ خىزمەتچىسى، نۇپۇس تۇرۇشلۇق ئورنى ۋە ھازىرقى تۇرۇشلۇق ئورنى: شەھىرىمىز تىيانشان رايونى تەنتەربىيە سارىيى يولى **-نۇمۇر **-بىنا **-ئىشىك **-ئۆيدە ئولتۇرۇشلۇق. 2019-يىلى 10-ئاينىڭ 31-كۈنى زەھەرلىك بويۇم ئېلىپ-سېتىش جىنايىتىگە چېتىلىپ ئۈرۈمچى شەھەرلىك ج خ ئىدارىسى ئاممىۋى قاتناش مىترو ئامانلىق ساقلاش شۆبىسى تەرىپىدىن تۇتۇلۇپ، زەھەر چەككەنلىكى ئۈچۈن 2019-يىلى 11-ئاينىڭ 1-كۈنى مەمۇرىي جەھەتتىن 15 كۈن توختىتىلىپ، مەجبۇرىي ئىككى يىل زەھەرسىزلەندۈرۈلگەن. 2019-يىلى 11-ئاينىڭ 15-كۈنى مەھكىمىمىز قولغا ئېلىشنى تەستىقلىغان، شۇ كۈنى ئۈرۈمچى شەھەرلىك ج خ ئىدارىسى ئاممىۋى قاتناش مىترو ئامانلىق ساقلاش شۆبىسى قولغا ئېلىشنى ئىجرا قىلغان.

ئۈرۈمچى شەھەرلىك ج خ ئىدارىسى ئاممىۋى قاتناش مىترو ئامانلىق ساقلاش شۆبىسى تەھقىقلەشنى ئاياقلاشتۇرۇپ 2020-يىلى 1-ئاينىڭ 1-كۈنى جاۋابكار زxنىڭ زەھەرلىك بويۇم ئېلىپ-سېتىش دىلوسىنى مەھكىمىمىزنىڭ تەكشۈرۈپ ئەيىبلىشىگە ئۆتكۈزۈپ بەرگەن، مەھكىمىمىز دىلونى قوبۇل قىلغاندىن كىيىن 1-ئاينىڭ 3-كۈنى جاۋابكارغا ئاقلىغۇچىغا ھاۋالە قىلىشقا ھوقۇقلۇق ئىكەنلىكىنى ۋە جىنايىتىنى تونۇپ جازانى ئىتراپ قىلىشنىڭ كەلتۈرۈپ چىقىرىش ئېھتىمالى بولغان قانۇنى ئاقىۋىتىنى ئۇقتۇردۇق. جاۋابكارنى قانۇن بويىچە سوراق قىلىپ، بارلىق دىلو ماتىرياللىرىنى تەكشۈرۈپ چىقتۇق. جاۋابكار بۇ دىلونى ئاددىي تەرتىپنى قوللىنىپ سوت قىلىشقا قوشۇلدى.

قانۇن بويىچە تەكشۈرۈپ ئېنىقلىشىمىزچە :

2019-يىلى 10-ئاينىڭ 31-كۈنى كەچ سائەت 23:10 لار ئەتراپىدا، جاۋابكار زx شەھىرىمىزنىڭ تىيانشان رايونى داۋان يۈشىن ئولتۇراق رايونى ئىچىدىكى راۋاق يېنىدا س X گە 2 بولاق 0.16 گىرام زەھەرلىك بويۇم خىروئىننى ساتقان نەق مەيداندا ج خ خادىملىرى تەرىپىدىن تۇتۇلغان ھەم جاۋابكار زxنىڭ يېنىنى ئاختۇرۇش ئارقىلىق يەنە 2 بولاق 0.11 گىرام زەھەرلىك بويۇم خىروئىن قولغا چۈشۈرۈلگەن. باھالاش دوكلاتىدا جاۋابكار زx ساتقان ۋە يېنىدىن ئاختۇرۇپ چىقىلغان گۇمانلىق بۇيۇمىنىڭ تەركىۋى خىروئىن دەپ بېكىتىلگەن.

يۇقارقى پاكىت تۆۋەندىكى دەلىل-ئىسپاتلار ئارقىلىق ئىسپاتلىنىدۇ:

1. ماددىي ئىسپات: بىر دانە يانفون، ئىككى دانە دېسكا.

2. يازما ئىسپات : جاۋابكارنىڭ سالاھىيەت ئىسپاتى، تۇتۇش جەريانى، ج خ ئورگىنىنىڭ زەھەرلىك بويۇمنى تۇتۇپ قېلىش، ئۆتكۈزۈپ بېرىش تالونى، ئاختۇرۇش خاتىرسى، ئەۋرىشكە ئېلىش ۋە ئېغىرلىقنى ئۆلچەش خاتىرسى، رەسىملىك كۆرۈنۈش قاتارلىقلار.

3. گۇۋاھچى س X نىڭ گۇۋاھلىق سۆزى؛

4. جاۋابكار زxنىڭ ئىقرارى ۋە ئۆزىنى ئاقلاش سۆزى؛

5. ئۈرۈمچى شەھەرلىك زەھەرلىك بويۇمىنى تەكشۈرۈش مەركىزىنىڭ زەھەرلىك بويۇمنى ئانالىز قىلىش تەكشۈرۈش دوكلاتى، ئۇقتۇرۇشنامىسى.

يۇقارقى دەلىل-ئىسپاتلارنى توپلاش تەرتىپى قانۇنلۇق، مەزمۇنى ئوبىكتىپ ۋە ھەقىقىي بولۇپ، ئەيىبلەنگەن پاكىتنى بېكىتىشكە بولىدۇ. جاۋابكار زxنىڭ ئەيىبلەنگەن جىنايەت پاكىتى ۋە دەلىل-ئىسپاتقا باشقىچە پىكرى يوق ھەمدە ئۆز ئىختىيارلىقى بىلەن جىنايىتىنى تونۇپ جازانى ئېتراپ قىلدى.

مەھكىمىمىزنىڭ قارىشىچە: جاۋابكار زx دۆلىتىمىزنىڭ زەھەرلىك بويۇم باشقۇرۇش تۈزۈمىگە خىلاپلىق قىلىپ قانۇنسىز ھالدا زەھەرلىك بويۇم ئېلىپ-ساتقان قىلمىشى « جۇڭخۇا خەلق جۇمھۇرىيىتى جىنايى ئىشلار قانۇنى » نىڭ 347- ماددىسىنىڭ 1-تارمىقى، 5-تارمىقىدىكى زەھەرلىك بويۇم ئېلىپ-سېتىش جىنايىتىنى شەكىللەندۈرگەن، جىنايى پاكىتى ئېنىق، دەلىل-ئىسپاتى تولۇق، زەھەرلىك بويۇم ئېلىپ-سېتىش جىنايىتى بويىچە جىنايى جاۋابكارلىقىنى سۈرۈشتۈرۈش كېرەك. جاۋابكار زx ئۆزىنىڭ زەھەرلىك بويۇم ئېلىپ-سېتىش قىلمىشىنى ئەينەن ئىقرار قىلغان، شۇڭا « جۇڭخۇا خەلق جۇمھۇرىيىتى جىنايى ئىشلار قانۇنى » نىڭ 67- ماددىسىنىڭ 3-تارمىقىنى تەدبىقلاش كېرەك. جاۋابكار زx جىنايىتىنى ئەينەن ئىقرار قىلغان، ئەيىبلىگەن جىنايى پاكىتقا ئىقرار، جازانى قوبۇل قىلىشنى خالايدۇ، شۇڭا « جۇڭخۇا خەلق جۇمھۇرىيىتى جىنايى ئىشلار دەۋا قانۇنى » نىڭ 15-ماددىسىنى تەدبىقلاش كېرەك. جاۋابكار زxغا 5 ئايلىق تۇتۇپ تۇرۇپ ئەمگەككە سېلىش جازاسى بېرىپ قوشۇمچە 1000 يۈەن شىتراف قويۇش تەكلىبىنى بېرىمىز. « جۇڭخۇا خەلق جۇمھۇرىيىتى جىنايى ئىشلار دەۋا قانۇنى» نىڭ 176-ماددىسىدىكى بەلگىلىمىسىگە ئاساسەن مەھكىمىڭىزلارنىڭ قانۇن بويىچە جازالىشىڭىزلارغا ئەيىبلىدۇق.

ھۆرمەت بىلەن :

ئۈرۈمچى شەھەر شىمگو رايونلۇق خەلق تەپتىش مەھكىمىسى

تەپتىش: پەرىدە مەمەت

مۇۋەققەت تەپتىش: ئەخمەتجان تۇردى

2020-يىلى 1-ئاينىڭ 19-كۈنى

ئىلاۋە:

1. جاۋابكار زx ھازىر ئۈرۈمچى شەھەرلىك 1-قاماقخانىدا قاماقتا.

2. ئاددىي تەرتىپ بويىچە سوت ئېچىش تەكلىبنامسى.

3. « جىنايىتىنى تونۇپ جازانى ئېتراپ قىلىش كېپىللىك خېتى » بىر نۇسخا.

4. ئىككى دانە دېسكا ئۆتكۈزۈپ بېرىلدى.

5. دىلو ماتىريالى 2 توپلام، ماددىي ئىسپاتلار، ئەيىبنامە بىلەن بىرگە يوللاندى.